KOFFI ANNAN AZIKOSOA NCHI ZA AFRIKA KUTISHIA KUJIONDOA ICC

Katibu Mkuu wa zamani wa Umoja wa Mataifa Kofi Annan amezikosoa vikali nchi za Afrika zinazotishia kujiondoa kwenye Mahakama ya Kimataifa ya Jinai (ICC) akisema kuwa hiyo ni alama ya aibu na fedheha kwa Afrika.

Annan aliyasema hayo katika sherehe ya kumuenzi Askofu Desmond Tutu aliyekuwa miongoni mwa viongozi wa mapambano dhidi ya ubaguzi wa rangi nchini Afrika Kusini na mshindi wa tuzo ya amani ya Nobel mwaka 1984. 

Annan amesema kama Waafrika wangeweza kutendewa uadilifu katika nchi zao kusingekuwepo haja ya kwenda kwenye Mahakama ya Kimataifa ya Jinai. 

Amesema katika bara la Afrika ambalo limeshuhudia migogoro iliyosababisha umwagikaji wa damu, ukiukaji mkubwa wa haki za binadamu na hata mauaji ya kimbari inashangaza kusikia watu wanasema kwamba kutafuta haki katika mahakama ya ICC kutakwamisha juhudi za kurejesha amani.
 
Mahakama ya Kimataifa ya Jinai (ICC) inakosolewa sana na Waafrika kwamba inawalenga viongozi wa bara hilo pekee na kufumbua jicho jinai zinazofanywa na viongozi wa nchi za Magharibi katika nchi mbalimbali duniani.

na radio tehranswahili