CHADEMA WAVITUHUMU VYOMBO VYA DOLA KUWAFAHAMU WAHUSIKA WA MLIPUKO JIJINI ARUSHA

Mwenyekiti wa chama cha Demokrasia na Maendeleo Chadema nchini Tanzania, Freeman Mbowe, amevituhumu vyombo vya dola kuwa, vinawafahamu watu waliohusika na mlipuko wa bomu uliotokea juzi katika viwanja vya Soweto kwenye mkutano wa chama hicho. 

Mbowe, amesema tukio hilo ni la kisiasa na lilipopangwa awali. Amesema wamegundua risasi za bunduki aina ya SMG na bastola zilitumika mara baada ya mlipuko huo jambo linalozusha hofu na kuhatarisha demokrasia ya vyama vingi nchini tanzania. 

Kwa upande wake Mkuu wa Jeshi la Polisi (IGP), Said Mwema ameunda timu itakayoongozwa na makamishna wawili, kwenda mkoani Arusha kuongeza nguvu ya uchunguzi wa tukio hilo.

 Mbowe amesema ni bora serikali itangaze kuachana na mfumo wa vyama vingi kuliko kuruhusu mauaji na vurugu katika mikutano ya vyama vya upinzani vinavyoonekana kutoa wakati mgumu kwa watawala. 

Amesisitiza kuwa, uchunguzi wa awali katika eneo la tukio umebaini kuwa bomu lililolipuliwa ni la kiwandani na si la kutengenezwa kwa mikono.

Wakati huo huo serikali imetoa tamko kuhusu mlipuko huo uliotokea mkoani arusha siku ya jumamosi katika mkutano wa kuhitimisha kampeni za uchaguzi wa viti vya udiwani uliofanyika jana.

Akitoa kauli hiyo Bungeni waziri wa nchi ofisi ya rais sera, uratibu na Bunge Wiliam Lukuvi amesema serikali haita vumilia vitendo hivyo vya uvunjifu wa amani na kuahidi zawadi ya shilingi milioni mia moja kwa mtu yeyote atakayewezesha kukamatwa kwa waalifu hao.

Hata hivyo Lukuvi amwailaumu viongozi wa vyama vya siasa kwa  kuwajengea chuki polisi kwa wanachama wake hali iliyochangia polisi kushindwa kumkamata mtuhumiwa baada ya wananchi kuanza kuwashambulia polisi baada ya mlipuko huo.