MABOSS WA LIVERPOOL HAWANA MPANGO WA KUMFUKUZA BRENDAN RODGERS

Kampuni ya Fenway Sports Group ya nchini Marekani ambao ni wamiliki wa klabu ya Liverpool , imesema haina mpango wa kumfukuza kocha wa klabu hiyo BRENDAN RODGERS kwa sasa.

Kocha huyo atakutana na Wamiliki wa Klabu hiyo mwishoni mwa msimu , ili kutathmini maendeleo kwa kuangalia malengo ya Klabu na kama malengo hayo yamefikiwa.

Msimu huu haujawa mzuri kwa Klabu ya Liverpool kutokana na kushindwa kufuzu kucheza ligi ya mabingwa Barani Ulaya , lakini pia kuondolewa katika hatua za nusu fainali ya michuano ya FA na kombe la Ligi.

Msimu uliopita Liverpool ilitumia zaidi ya euro milioni 100 kwa ajili ya usajili wa wachezaji wengi akiwemo  MARIO BALOTTELI ,ADAM LALLANA,  RICKIE LAMBERT, DEJAN LOVREN, DIVOCK ORIGI na ALBERO MORENO toka Sevilla.

 

Wakati huohuo mshambuliaji wa Klabu hiyo RAHEEM STERLING alijikuta akizomewa na mashabiki katika hafla ya utoaji wa tuzo za Klabu hiyo hapo jana.

Mchezaji huyo alizomewa wakati akienda kuchukua tuzo yake ya mchezaji bora mwenye umri mdogo wa Klabu hiyo.

Kuzomewa kwa mchezaji huyo kumekuja kipindi ambacho , anataka kuongezewa mkataba mpya , lakini pia huku akitishia kuondoka katika klabu hiyo.