RAIS WA MISRI AGOMA KUJIUZULU KAMA ALIVYOSHAURIWA NA JESHI LA NCHI HIYO

Muda mchache baada ya Rais Mohammed Mursi kulihutubia taifa kwa njia ya televisheni na kusema kwamba hatojiuzulu kukidhi matakwa ya waandamanaji na jeshi, uongozi wa juu wa kijeshi nchini humo umesema kwamba uko tayari kufa katika kuwalinda watu wa Misri dhidi ya wale waliowaita "magaidi na wapumbavu."


Taarifa iliyotumwa kwenye ukurasa wa Facebook wa Baraza Kuu la Kijeshi, linaloongozwa na mkuu wa majeshi, Jenerali Abdel Fattah al-Sisi, inasomeka: "Tunaapa kwa Mungu kwamba tutajitolea muhanga hata damu yetu dhidi ya gaidi, mtu mwenye siasa kali au mpumbavu yeyote." 


Tamko hili limetolewa masaa matatu tu tangu Mursi kukataa sharti lililotolewa na al-Sisi ambalo lilimtaka rais huyo kugawana madaraka na wapinzani wake au akabiliwe na suluhisho la kijeshi kufikia saa 11 jioni. 


Chanzo kimoja cha kijeshi kimesema kwamba taarifa hiyo inaweka wazi kwamba jeshi halitaachana na madai yake. 


Katika hotuba yake ya usiku wa kuamkia leo, Mursi aliwaalika wapinzani kujiunga na majadiliano, lakini wapinzani wamekuwa wakikataa mara kwa mara mazungumzo hayo.


Wakati hayo yakitokea, taarifa za hivi punde zinasema kwamba makabiliano kati ya wafuasi wa Mursi na vikosi vya usalama yamesababisha watu 16 kuuawa na zaidi ya 200 kujeruhiwa. 


Mashahidi wanasema wamesikia milio ya risasi karibu na Chuo Kikuu cha Cairo, ambako wafuasi hao walikusanyika kumuunga mkono kiongozi wao.