ETO'O ATWAA TUZO YA KUPINGA UBAGUZI WA RANGI

Mshambuliaji wa zamani wa vilabu vya Barcelona na Inter Milan Samuel Eto’o amepewa tuzo ya ustamilivu yenye lengo la kupiga vita ubaguzi wa rangi na Shirika lisilo la kiserikali linalofahamika kama Baraza la Maridhiano na Usuluhishi.

Sherehe za tuzo hizo zilifanyika jana usiku katika ukumbi wa Kensington jijini London nchini England, Eto’o aliambata na wachezaji wenzake Deco pamoja na Kolo Toure ambao nao walikuwa sehemu ya wageni waalikwa.

Baada ya tuzo hiyo,Eto’o alisema kuwa umefika wakati sasa adhabu za vitendo vya kibaguzi kuwa kubwa ili kukomesha tabia hiyo.

Mwaka 2005 Eto’o akiwa na klabu ya Barcelona, alifanyiwa vitendo vya kibaguzi na mashabiki wa Real Zaragoza ambao walikuwa wakifanya kejeli zinazofanana na nyani huku zaidi wakimlenga Eto’o.

Tuzo zinazotolewa na Baraza hilo zilianza rasmi mwaka 2010 na zilishuhudia Mfalme wa Hispania Juan Carlos akichukua tuzo hiyo.