FREEMAN MBOWE AWASIFU WABUNGE KWA MSIMAMO WAO JUU YA BAJETI YA WIZARA YA MAJI

KIONGOZI wa Kambi ya Upinzani Bungeni, Freeman Mbowe, amepongeza msimamo wa wabunge hasa wa CCM kwa kuweka itikadi zao pembeni na kusimamia kidete suala la bajeti ya Wizara ya Maji, hadi ikasitishwa ili iboreshwe zaidi. Pia kiongozi huyo, pamoja na kudai kuwa adhabu waliyopewa wabunge watano wa chama chake haikustahili, lakini akakiri kuwa walihusika katika vurugu ndani ya Bunge, ikiwa ni pamoja na mmoja wao kudharau mamlaka ya Spika.

Aidha, Mbowe amebainisha kuwa kambi ya upinzani inataka utaratibu wa mashine za kupigia kura zilizopo ukumbini kwenye kila meza ya mbunge uanze kutumika mara moja, badala ya kura za ndiyo na hapana ili kuondokana na mikanganyiko na kutotendeka kwa haki wakati wa kupiga kura hizo.

Akizungumza na waandishi wa habari mjini dodoma, Mbowe alisema mshikamano uliojionesha wa wabunge bila kujali itikadi zao za vyama wakati wa kujadili bajeti ya maji umeonesha ukomavu wa kisiasa, hali ambayo ndiyo inapaswa iendelezwe bungeni.

“Nashukuru jana (juzi) bungeni wabunge wengi wakiwamo wa CCM walikataa kuiunga mkono hoja hii ya bajeti kwa msingi mmoja, kwamba haikidhi mahitaji, na sisi wapinzani kwa kweli hoja zetu zilipata nguvu kwa sababu takribani wabunge wote walituunga mkono,” alisema.

Alisema endapo kila siku hali ya uchangiaji na misimamo ya maslahi ya Taifa itafanyika kama ilivyofanyika katika hoja ya maji, ni wazi kuwa ushirikiano wa aina hiyo utaijenga nchi kwa misingi ya maendeleo.

Hata hivyo, Mbowe alitaka Wizara ya Maji, keshokutwa itakapowasilisha maboresho hayo katika bajeti yake, ije na mipango thabiti ya kumaliza tatizo la maji nchini, ikiwa ni pamoja na kuachana na kutafuta Sh bilioni 100 za kuongezewa katika bajeti hiyo na kutafuta zaidi ya Sh bilioni 500 ili kutekeleza Mpango wa Maendeleo wa Miaka Mitano.

Kuhusu adhabu za wabunge watano wa chama chake kupewa adhabu kwa utovu wa nidhamu, alikiri kuwa mmoja wa wabunge wa chama chake, alidharau mamlaka ya Spika lakini kanuni zilizotumika hazikustahili na zilikuwa kiini macho.

Alisema Naibu Spika, Job Ndugai, hakustahili kutumia kanuni hizo za kifungu cha 2.2 na 5 za Bunge toleo la mwaka 2013, ambazo zinamtaka Spika atoe uamuzi kuhusu jambo litakalotokea bungeni endapo katika kanuni zilizopo hazina Mwongozo.

“Ukweli ni kwamba vurugu zilizotokea bungeni na kitendo cha mbunge wetu Mnadhimu wa Kambi ya Upinzani Tundu Lissu kinachodaiwa kuwa amedharau mamlaka ya kiti, kanuni zake zipo pamoja na adhabu yake,” alisema.

Alisema katika kanuni hizo za Bunge, vifungu 74 na 76 zimebainisha wazi adhabu zinazotakiwa kutolewa kwa mbunge atakayebainika kudharau mamlaka ya Spika au kuwa chanzo cha vurugu ndani ya Bunge.

“Ni kweli hakuna shaka kabisa mbunge wetu alidharau mamlaka ya Spika, lakini zipo adhabu stahiki za kushughulikia suala hilo, na kwa namna kanuni hizo zilivyo kama zingetumika vizuri, huenda adhabu ingekuwa kubwa zaidi ya hii iliyotolewa, huku akiongeza kuwa wabunge hao walioadhibiwa hawakupewa haki ya kusikilizwa,” alisisitiza.

Adhabu hizo ni pamoja na Spika kutaja jina la Mbunge husika hadharani kuwa amedharau kiti na kumpeleka mbele ya Kamati ya Haki, Maadili na Madaraka na Bunge na kwa upande wa fujo zinapotokea ndani ya ukumbi huo wa Bunge, kabla ya kutoa hoja ya nguvu, hutakiwa kwanza kuahirisha Bunge.

“Siku ile kweli vurugu zilitokea na kulikuwepo na vitendo vya kudharau mamlaka ya Spika, lakini Naibu Spika alitakiwa kwanza aahirishe Bunge, ndipo atumie nguvu, sasa badala yake waliingia askari wa kila aina ndani ya ukumbi jambo ambalo ni kinyume na Kanuni za Bunge,” alisisitiza.

Aidha, alisema kuhusu suala la adhabu kwa mbunge anayedharau kiti au kuhusika na vurugu, hutakiwa kwanza Spika amfikishe mbunge husika mbele ya Kamati ya Haki, Maadili na Madaraka ambayo baada ya kushauriana ndipo hutoa adhabu ambayo ni kutohudhuria Bunge vikao 10 iwapo kosa ni la kwanza na vikao 20 iwapo kosa ni la pili.

“Adhabu yoyote inayotolewa bungeni hutolewa kwanza na Azimio la Bunge na si Spika mwenyewe, endapo kanuni zilizopo zingefuatwa, huenda wahusika kama wangethibitika kabisa kuwa wamekosa, wangepata adhabu kali zaidi kama zilivyoainishwa kwenye kanuni,” alisema Mbowe.

Wabunge wa Chadema walioadhibiwa kutokana na vurugu zilizotokea bungeni humo hivi karibuni pamoja na Lissu, ni Ezekiah Wenje (Nyamagana), Highness Kiwia (Ilemela), Joseph Mbilinyi (Mbeya Mjini), Godbless Lema (Arusha Mjini) na Peter Msigwa (Iringa Mjini).

Akizungumzia suala la mashine za kura bungeni, alisema utaratibu unaotumika sasa wa kura za ndiyo na hapana ni wa zamani na hautendi haki, kwani huegemea zaidi katika uamuzi wa Spika na si wabunge.

“Lakini Bunge letu lina vifaa vinavyoonesha namna ya kupiga kura na kuonekana kwenye meza ya Spika, tena yapo maelekezo yanayomwezesha mbunge husika jina lake lionekane au la, sasa sielewi kwa nini bado tunang’ang’ania mfumo wa ndiyo na hapana, hapa kuna mchezo mchafu,” alisisitiza.

Alisema mfumo huo ukitumika, utaongeza uhuru wa wabunge kupiga kura bila kujali itikadi za vyama na kutanguliza maendeleo ya wananchi, kwani kwa sasa mtindo wa kura za ndiyo na hapana hufanya wabunge wengine washindwe kutoa uamuzi sahihi kwa hofu ya kuitwa wasaliti.

Pamoja na hayo, Mbowe alisema kambi ya upinzani inaitaka Serikali iwasilishe utekelezaji wa maazimio kuhusu suala la Richmond, ripoti ya Jairo, maazimio ya kamati ndogo ya Maliasili na Utalii kuhusu usafirishaji wa twiga na wanyama wengine hai na suala la mabilioni ya Uswisi.

habari leo chanzo