YANGA YAINGIA KAMBINI KUIVAA PLATINUM JPILI

Baada ya kukubali kipigo kutoka kwa watani wao wa jadi, timu ya yanga leo imeingia kambini kwa ajili ya maandalizi ya mchezo wake wa kombe la shirikisho dhidi ya timu ya platinum ya Zimbabwe.

Afisa habari na mawasiliano wa timu hiyo Jerry Murro amesema tayari waamuzi wa mchezo huo wameshatajwa ambao watatoka Djibout huku wageni wao wakitarajiwa kuwasili nchini tarehe 12.

Kambi ya timu hiyo itakua katika hotel ya tasoma na itakua ikifanya mazoezi katika viwanja vitatu vya loyola, karume na taifa.

Katika mchezo wa hatua ya awali dhidi ya timu ya BDF Eleven ya Botswana klabu hiyo ilizuia mchezo wake kuoneshwa moja kwa moja, lakini katika mchezo huo wa jumapili uongozi wa timu hiyo umesema milango ipo wazi kwa chombo cha habari kinachotaka kuonesha mchezo huo.

Kuhusiana na kipigo walichokipata kutoka kwa watani wao Simba, Murro anasema kipigo kile kilitokana na makosa machache ya timu yake na hatafutwi mchawi kutokana na matokeo yale na hakuna mchezaji yoyote atakayesimamishwa.

Mchezo wa Yanga na Platinum utafanyika siku ya jumapili katika uwanja wa Taifa, kabla ya marejeano wiki mbili baadae nchini Zimbabwe.

Wakati huo huo shirikisho la soka nchini TFF limehairisha  michezo miwili ya Ligi Kuu ya Vodacom iliyokuwa iichezwe kesho (jumatano)  kati ya JKT Ruvu dhidi ya Young Africans katika uwanja wa Taifa, na Mgambo Shooting dhidi ya Azam FC uwanja wa Mkwakwani jijini Tanga na sasa mechi hizo zitapangiwa tarehe nyingine.