MORGAN TSANGIRAI AONDOLEA MBALI KESI YA KUPINGA MATOKEO

Kiongozi wa chama cha MDC nchini Zimbabwe Morgan Tsangirai ameondoa kesi aliyokuwa amewasilisha mahakamani akiwa  na  nia ya kupinga  matokeo ya uchaguzi wa urais mwezi uliopita yaliyompa Rais Robert Mugabe ushindi.


Tsangirai ambaye alikuwa waziri mkuu katika serikali ya mseto pamoja na Mugabe amesema kesi hiyo iliyopangwa kusikizwa leo haiwezi kuendelea kwasababu tume ya uchaguzi nchini Zimbabwe bado haijampa nakala alizohitaji kutumia kuwasilisha hoja zake mahakamani.


Kulingana na tume hiyo Tsangirai alipata asilimia 34 ya kura zilizopigwa katika uchaguzi huo huku Mugabe akitangazwa mshindi kwa asilimia 61.


Katika kesi hiyo Tsangirai alisema tume hiyo ya uchaguzi ilimpa ushindi Mugabe kwa njia za udanganyifu ambaye amekuwa akiliongoza taifa hilo tangu mwaka 1980. 


Uchaguzi huo wa mwezi uliopita ulitarajiwa kufikisha mwisho serikali ya kugawana madaraka kati ya Rais Mugabe na Tsangirai iliyoundwa mwaka 2008 baada ya uchaguzi uliokuwa  na utata ambao viongozi wa Afrika walikataa kutambua matokeo hayo yaliyompa ushindi Mugabe ambayo yalikumbwa na hali ya ghasia na ukandamizaji.

na dwswahili