SIKU 2 ZAONGEZWA USHIRIKI WA SPORTS XTRA NDONDO CUP

Kamati ya mashindano ya chama cha soka mkoa wa Dar  es salaam DRFA ambayo kimsingi ndio wasimamizi wa michuano ya SPORTS XTRA NDONDO CUP  wameongeza muda wa uthibitisho wa ushiriki.

Kamati hiyo imefikia uamuzi huo baada ya timu nyingi kuonesha nia ya kushiriki mashindano hayo yanayofanyika kwa mara ya pili mwaka huu, ambapo sasa zimeongezwa siku mbili ambazo zitakua ni jumatano na alhamisi ya wiki ijayo baada ya mapumziko ya sikukuu ya pasaka.

Katibu wa kamati hiyo Daud Kanuti amesema siku ya jana ambayo ilikua mwisho wa uthibitisho alipokea simu nyingi za viongozi wa timu mbalimbali wakimtaarifu kushindwa kufika ofisini kwake kutokana na hali ya hewa ya mvua na foleni ya jiji la Dar  es salaam.

Baadhi ya timu mpya zilizojitokeza kushiriki mashindano hayo ya timu za mtaani mwaka huu ni Chalinze City, Mkuranga, Rufiji United, Mjivuni fc, Vijibwni City, Gomes United, Kauzu fc, Keko Furniture, Kiwalani United, na Devis Corner.

SPORTS XTRA NDONDO CUP mwaka huu inatarajia kuanza mara baada ya kumalizika kwa ligi kuu ya Vodacom mwezi mei.