WAHINDI WAMTAKA MKUU WA POLISI NEW DELHI AJIUZULU

Maelfu ya wakazi wa mji wa New Delhi jana waliandamana katika mitaa mbalimbali ya mji mkuu huo wa India wakitaka kujiuzulu mkuu wa polisi wa mji huo kufuatia kubakwa na wanaume wawili mtoto wa kike aliyekuwa na umri wa miaka mitano hivi karibuni.

Wakazi wa New Delhi waliandamana katika mji huo wakishinikiza kujiuzulu Neeraj Kumar wakati polisi wakimsindikiza mtuhumiwa wa pili mahakamani hapo jana. 

Waandamanaji wamesema wanataka mkuu huyo wa polisi wa New Delhi ajiuzulu wadhifa huo kwa kuwa ameshindwa kuchukua hatua yoyote ya kudhamini usalama wa wanawake licha ya kutokea matukio mfululizo yanayohusiana na usalama wa wanawake kama ya kubakwa.

Wanawake na watoto wadogo pia walikuwa miongoni wa wakazi wa mji wa New Delhi walioandamana jana kulalamikia kubakwa binti wa miaka mitano mjini humo. 

Hayo yote yanajiri katika hali ambayo Jumatatu wiki hii mkuu huyo wa polisi ya New Delhi alikataa kujiuzulu akisema kuwa kujiuzulu kwake hakutasaidia kuhakikisha kuwa haki inatendeka katika kesi hiyo. 

Mtuhumiwa wa pili katika kesi hiyo ya kumbaka binti huyo wa miaka mitano aliyetajwa kwa jina la Pradeed Kumar mwenye umri wa miaka 19 alikamatwa juzi katika jimbo la Bihar, ambako mtuhumiwa wa kwanza Manoj Kumar alitiwa mbaroni pia.