KUCHELEWA KUONDOKA KWA YANGA KUNA FAIDA DHIDI YA PLATINUM?

Timu ya soka ya yanga ambao ndio wawakilishi pekee wa nchi katika michuano ya kimataifa katika kombe la shirikisho kesho wanatarajia kuwafuata wapinzani wao nchini Zimbabwe.

Kwa mujibu wa katibu mkuu wa timu hiyo Dr. Jonas Tiboroha timu hiyo inatarajia kuondoka majira ya saa nne asubuhi kuelekea Bulawayo kabla ya kuifuata timu ya platinum katika uwanja Mandava uliopo mji wa Gweru.

Baada ya yanga kupata ushindi katika mchezo wa kwanza kwa mabao 5-1 majuma matatu yaliyopita ilitangaza kuondoka mapema kuifuata timu hiyo ili kuepuka usumbufu walioupata timu ya sofa paka pindi walipowafuata platinum.

Lakini baadae timu hiyo ilibadili ratiba ya safari yake na kuamua kuondoka siku moja kabla ya mchezo huo hali ambayo inatoa wasiwasi kwa wapenzi wa timu hiyo kama kweli inaweza kufanya vizuri na kusonga mbele.

Kwa mazingira ya safari hiyo inaonesha yanga haitapata nafasi ya kufanya mazoezi kwenye uwanja watakaoutumia siku ya jumamosi hali ambayo inaweza ikawaathiri.

 

Timu ya platinum ni timu ya mgodi kama ilivyo kwa timu ya mwadui ya mkoani shinyanga na mchezo huo utapigwa mgodini ambapo ukaguzi huwa wa hali ya juu jambo ambalo linaweza kuwaathiri wachezaji ikizingatiwa watafika siku hiyo hiyo ya mchezo.

Hazina ya ushindi wa mabao 5-1 iliyonayo yanga inaweza kuwa ndio iliyowapa kiburi hicho cha kuchelewa kuwafuata wapinzani wao japo kama wao waliweza kushinda 5 nyumbani Platinum wanashindwaje kushinda 4 nyumbani?

Mashabiki wa timu hiyo wao walitangulia na basi tangu siku ya jumanne wakiongozwa na mkuu wa kitengo cha habari na mawasiliano Jerry Murro.

Endapo yanga itafanikiwa kuitoa FC Platinum itaingia katika hatua ya 16 bora na itakutana na mshindi kati ya timu za Benifica de Luanda ya Angola au Etoile du Saleh ya Tunisia.